Eze 28 | NdeIBE | STEP | Ilizwi likaJehova lafika kimi lisithi:

Ezekiel 28

Isiphrofetho Ngokumelana Lenkosi YaseThire.

1 Ilizwi likaJehova lafika kimi lisithi:

2 “Ndodana yomuntu, tshono kumbusi waseThire uthi, ‘Nanku okutshiwo nguJehova Wobukhosi: “ ‘Ngokuzigqaja kwenhliziyo yakho uthi, “Ngingunkulunkulu; ngihlala esihlalweni sobukhosi sikankulunkulu enzikini yezilwandle.” Kodwa wena ungumuntu hatshi unkulunkulu, lanxa ucabanga ukuthi uhlakaniphe njengonkulunkulu.

3 Kambe uhlakaniphile kuloDanyeli na? Akulamfihlo esithekileyo kuwe na?

4 Ngenhlakanipho yakho lokuqedisisa uzizuzele inotho njalo wabuthela igolide lesiliva eziphaleni zengcebo yakho.

5 Ngolwazi lwakho olukhulu ekuthengiseni uyandisile inotho yakho, njalo ngenxa yenotho yakho, inhliziyo yakho isizigqaja.

6 “ ‘Ngakho nanku okutshiwo nguJehova Wobukhosi: “ ‘Njengoba ucabanga ukuthi uhlakaniphile, uhlakaniphe njengonkulunkulu,

7 ngizaletha abezizweni ukuba bamelane lawe, izizwe ezilesihluku kakhulu; zizahwatsha izinkemba zazo zimelane lobuhle bakho kanye lenhlakanipho, zone lobuhle bakho obukhazimulayo.

8 Zizakwehlisela phansi egodini, njalo uzakufa kabuhlungu enzikini yezilwandle.

9 Lapho-ke uzakutsho na phambi kwalabo abakubulalayo ukuthi, “Mina ngingunkulunkulu?” Uzakuba ngumuntu nje, hatshi unkulunkulu, ezandleni zalabo abakubulalayo.

10 Uzakufa ukufa kwabangasokanga ezandleni zabezizweni. Sengikhulumile, kutsho uJehova Wobukhosi.’ ”

11 Ilizwi likaJehova lafika kimi lisithi:

12 “Ndodana yomuntu, khala isililo ngenkosi yaseThire uthi kuyo: ‘Nanku okutshiwo nguJehova Wobukhosi: “ ‘Wawuyisibonelo sokuphelela ugcwele inhlakanipho lobuhle obupheleleyo.

13 Wawuse-Edeni isivande sikaNkulunkulu; waceca ngawo wonke amatshe aligugu: irubhi, lethophazi le-emeralidi, ikhrisolithe, i-onikisi lejaspa, isafire, ithukhwayizi lebherili. Izibonakaliso zakho lezisekelo kwakwenziwe ngegolide; kwalungiswa ngosuku owadalwa ngalo.

14 Wagcotshwa njengekherubhi elondlayo, ngoba ngakumisela lokho. Wawuphezu kwentaba engcwele kaNkulunkulu; wahamba phakathi kwamatshe avutha umlilo.

15 Wawungelasici ezindleleni zakho kusukela ngosuku owadalwa ngalo ububi baze bafunyanwa kuwe.

16 Ngenxa yokuthengisa kwakho ezindaweni ezinengi wagcwala udlakela, wasusona. Ngakho ngakususa uhlazekile entabeni kaNkulunkulu, njalo ngakuxotsha, wena kherubhi elondlayo, phakathi kwamatshe avutha umlilo.

17 Inhliziyo yakho yazigqaja ngenxa yobuhle bakho, njalo wonakalisa inhlakanipho yakho ngenxa yobucwazicwazi bakho. Ngakho ngakuphosela emhlabeni; ngakwenza umbukiso phambi kwamakhosi.

18 Ngezono zakho ezinengi lokuthengisa lobuqili usungcolise izindawo zakho ezingcwele. Ngakho ngaphemba umlilo phakathi kwakho wakutshisa wakuqeda, njalo ngakwenza waba ngumlotha emhlabathini phambi kwabo bonke ababekhangele.

19 Zonke izizwe ezazikwazi zithithibele ngawe; usufike ekucineni okwesabekayo njalo kawuyikuba khona futhi.’ ”

Isiphrofetho Ngokumelana LeSidoni

20 Ilizwi likaJehova lafika kimi lisithi:

21 “Ndodana yomuntu, khangelisa ubuso bakho eSidoni; uphrofethe okubi ngalo 22 uthi: ‘Nanku okutshiwo nguJehova Wobukhosi: “ ‘Ngimelana lawe, wena Sidoni, njalo ngizathola udumo phakathi kwakho. Bazakwazi ukuthi mina nginguJehova lapho sengiletha isijeziso kulo njalo ngizibonakalisa ngingongcwele phakathi kwalo.

23 “Ngizathumela isifo kulo ngenze igazi ligeleze ezitaladeni zalo. Abafileyo bazakuba phakathi kwalo, inkemba imelane lalo amacele wonke. Lapho-ke bazakwazi ukuthi mina nginguJehova.

24 “Abantu bako-Israyeli kabasayikuba labomakhelwane abanhliziyombi abangameva abuhlungu lameva ahlabayo. Lapho-ke bazakwazi ukuthi mina nginguJehova Wobukhosi.

25 “ ‘Nanku okutshiwo nguJehova Wobukhosi: Lapho sengiqoqa abantu bako-Israyeli ezizweni ababehlakazelwe kuzo, ngizazibonakalisa ngingongcwele phakathi kwabo phambi kwezizwe. Emva kwalokho bazahlala elizweni labo, engalinika inceku yami uJakhobe. 26 Bazahlala kulo bevikelekile njalo bazakwakha izindlu bahlanyele lezivini; bazahlala bevikelekile lapho sengiletha isijeziso kubo bonke omakhelwane babo ababaphatha kubi. Lapho-ke bazakwazi ukuthi mina nginguJehova uNkulunkulu wabo.’ ”